COMENTE FUNTZIONAT

Home / SA CUNFERENTZIA ABERTA / COMENTE FUNTZIONAT

Sa Cunferèntzia Aberta de su sardu no tenet palcu, ma grupos de traballu, chi nois mutimus “panels”.
No si nche benet pro iscurtare, ma pro traballare in pare cun àtera gente amantiosa issa puru de su sardu. Tocat duncas a intrare in unu panel pro pigare parte a sa Cunferèntzia.

Sa Cunferèntzia est aberta a totus, e totus sunt cumbidados a partetzipare, criticare, intervènnere, cumpartzire esperièntzias, propònnere solutziones e alternativas.

Amus seletzionadu 8 panels, chi currispondent a temàticas chi pertocant sa limba sarda a dies de oe. Cada unu podet seberare petzi unu panel a su cale cheret partetzipare. Si podet seberare unu àteru panel petzi una borta, ma durante sa die de sa Cunferèntzia etotu.

Sa Cunferèntzia la faghent is partetzipantes, nono is organizadores. Nois no partetzipamus a sa Cunferèntzia a manera chi siat respetadu su printzìpiu de sa neutralidade cosa nostra.

In cada panel b’at a nch’essere unu Moderadore (o “fatzilidadore”). Tenet sa funtzione de gestire su panel e assegurare chi totus potzant faeddare liberamente e sena essere limitados. Is moderadores/moderadoras no partètzipant a sa Cunferentzia e abarrant neutrales.

B’at a nch’essere puru unos/as segretàrios/as: issos/as tenent sa funtzione de trascrìere s’arresonamentu de su panel chi pustis nch’at a confluire in unu Raportu o Informe finale.

Acanta de is momentos de traballu b’ant a èssere momentos de recreu puru, e unas cantas sessiones plenàrias: una sessione de abertura, una sessione de serradura, e una sessione poster.

Is grupos de traballu o panel s’acordant pro 90 minutos (una ora e mesu) pro tres bortas in sa die de sa Cunferèntzia. Su primu dedicadu a sa Dibata generale, su segundu e su tèrtziu a s’elaboratzione de unu Documentu/Progetu/Proposta finale.

• Su Documentu podet èssere un’interventu o una declaratzione a pitzu de una problemàtica de su sardu, segundu su puntu de vista de su grupu in ue si traballat

• Su Progetu podet èssere un’idea de atividade o faina comune de is partetzipantes, chi cumprendat unu programa de traballu.

• Sa Proposta podet èssere un’idea pro solutzionare unu problema chi pertocat sa temàtica de su panel.

• Sa Sessione Poster est riservada a impresàrios, siendas, grupos o assòtzios sena profetu chi traballant cun su sardu o pro su sardu (fainas econòmicas, culturales, de interventu sotziale), chi bolent fàghere publitzidade a sa sienda issoro e chircare collaboradores, sòtzios etz.